Khutbah Jum'at Bahasa Sunda: AJARAN NABI MUHAMMAD SAW

 Jum’at, 15 Januari 2016/ 5 Rabiul Akhir 1437

AJARAN NABI MUHAMMAD SAW

اَلْحَمْدُ لِلهِ اَمَرَنَا بِاَنْ نَشْكُرَ اْلِاحْسَانَ, وَالَّذِيْ هَدَانَا اِلَى اْلِاسْلَامِ وَاْلِاْيمَانِ. واَشْهَدُ اَنْ لَّااِلَهَ اِلَّااللهُ وَاَشْهَدُ اَنَّ مُحَمَّدًا عَبْدُهُ وَرَسُوْلُهُ. اَللَّهُمَّ فَصَلِّ وَسَلِّمْ عَلَى هَذَا النَّبِيِّ الْكَرِيْمِ وَعَلَى اَلِهِ وَصَحْبِهِ اَجْمَعِيْنَ.قال الله تعالى فى القران الكريم اِنَّ اللهَ مَعَ الَّذِيْنَ اتَّقَوْا وَالَّذِيْنَ هُمْ مُحْسِنُوْنَ. اَمَّا بَعْدُ, فَيَااَيُّهَا الْحَاضِرُوْنَ اُوْصِيْكُمْ وَاِيَّايَ بِتَقْوَى اللهِ فَاِنَّهُ يُحِبُّ الْمُتَّقِيْنَ.

Sadaya puji kagungan Allah Rabbul 'Alamiin. Urang sadaya manjatkeun puji sinareng syukur ka Manten-Na, nyuhunkeun pitulung, sareng pangampunana-Na .

Oge urang nyuhunkeun perlindungan ka Allah tina sagala rupi kajahatan anu aya dina diri, sareng tina kalemahan amal-amal urang. Shalawat sinareng salam mugia salamina tetep dilimpahkeun ka Jungjunan urang sadayana, Kangjeng Nabi Muhammad SAW Oge ka kulawargina, ka para sahabatna, sareng ka sadaya pengikutna dugikeun ka Akhir zaman, oge mudah-mudahan urang sadayana kaangken umat mantena, Amin ya robbal alamin.

Hadirin Kaum Muslimin Rahimakumullah

Wasiat taqwa magrupikeun hiji hal anu paling penting dina shalat jumat, sahingga dimana aya hiji jumat anu dilebet khutbahna teu di sarengan ku wasiat taqwa, maka henteu sah eta shalat jumatna.Ku kituna dina kasempatan jumat ieu simkuring salaku khotib umajak, khususna kanggo diri simkuring pribadi, sareng umumna ka sadaya kaum muslimin.Hayu urang sami-sami Taqwa ka Allah SWT kalayan kataqwaan anu sabener-benerna. Jeung urang ulah maot kecuali aya dina islam

Hadirin sidang jum’ah rohimakumulloh!

Cobi perhatoskeun Hadis Nabi Muhammad SAW ani diriwayatkeun ku Imam Atturmudzi ti Ibnu Abbas.

كُنْتُ خَلْفَ النَّبيِّ صلى الله عليه وسلم يَوْمًا ، فَقَالَ : ( يَا غُلَام ، إِنِّي أُعَلِّمُكَ كَلِمَاتٍ : اِحْفَظِ اللهَ يَحْفَظْكَ ، اِحْفَظِ اللهَ تَجِدْهُ أَمَامَكَ ، تَعْرِفْ إِلَى اللهِ فِي الرَّخَاءِ يَعْرِفْكَ فِـي الشِدَّةِ، وَاعْلَمْ أَنَّ مَا أَخْطَأَكَ لَمْ يَكُنْ لِيُصِيْبَكَ ، وَمَا أَصَابَكَ لَمْ يَكُنْ لِيُخْطِئَكَ ، وَاعْلَمْ أَنَّ النَصْرَ مَعَ الصَبْرِ ، وَأنَّ الْفَرْجَ مَعَ الْكَرْبِ ، وَأَنَّ مَعَ الْعُسْرِ يُسْرًا

“nalika kaula dibonceng ku Rosululloh dina onta maka Rosululloh nyarios kieu: “Ya Ghulam! Kaula rek mere ka maneh sababaraha ajaran. Jaga ku anjeun Alloh swt, maka pasti Allah swt bakal ngajaga anjeun, jaga ku anjeun Alloh, anjeun bakal manggihan Alloh dihareupeun anjeun, sareung saterasna....”

Maksadna ngajaga Alloh teh nyaeta malihara ajaran-ajaranana ngajalankeun sakabeh parentah-Na jeung ngajauhan naon anu dilarang-Na.

Lamun urang geus bener-bener ngajalankeun sagala parentah-Na maka saolah-olah Allah aya dihareupeun urang. Sagala kabutuhan urang bakal dibantu ku Allah swt.

Sakumaha dawuhanana di Surat An-Nahl/16 ayat 128

اِنَّ اللهَ مَعَ الَّذِيْنَ اتَّقَوْا وَالَّذِيْنَ هُمْ مُحْسِنُوْنَ

“saenya-enyana Allah swt eta nyarengan jalma-jalma anu taqwa jeung jalma-jalma anu sok ngajalankeun kasaean.”

Ajaran anu kadua: Sing wawuh jeung Allah diwaktu senang maka allah bakal wawuheun ka anjeun nalika susah

Para Hadirin Kaum Muslimin!

Geus jadi tabeat manusa sok poho ka Allah diwaktu senang tapi mana datang kasusahan; meunang panyakit kakara inget ka Allah, kumari kitu dimana urang meunang kasenangan kade ulah poho ka Allah.

Ajaran anu katilu: kanyahokeun ku anjeun yen naon-naon anu moal tumiba ka anjeun, moal keuna ka anjeun, jeung naon-naon anu bakal keuna ka anjeun moal nyalahan. Dina hadis ieu Kangjeung Nabi ngajarkeun ka urang umatna supaya ulah boga sipat borangan, sabab lamun Allah bakal nyalametkeun, pasti urang bakal salamet, jadi urang teu kudu sieun ku maot dina ngalaksanakeun ajaran-ajaran Allah swt. Maot eta bakal datang daek teu daek.

Ajaran anu kaopat: kanyahokeun ku maneh saenya-enyana kameunangan eta dibarengan ku kasabaran. Jadi lamun urang hayang hasil cita-cita atawa maksad kudu sabar bari jeung usaha.

Ajaran anu kalima: saenya-enyana ari kasenangan dibarung ku kasusahan.

Jadi lamun urang hayang senang kudu ngalaman susah heula, kitu deui lamun urang meunang kasusah ulah putus asa, da urang mah boga pangeran Allah SWT. Sakumaha dawuhanana dina Surat Al-Hijr/15 ayat 56:

 وَمَنْ يَقْنَطُ مِنْ رَحْمَةِ رَبِّهِ إِلَّا الضَّالُّونَ

“henteu aya anu putus asa tina rohmat Allah swt. Anging jalma-jalma anu kasasar.”

Hadirin sidang jum’ah anu mulya

Mudah-mudahan Allah swt maparin taupiq sinareung hidayah ka urang sadaya sahingga tiasa ngahontal darajat taqwa. Amin yaa robbal alamin.

بَارَكَ اللهُ لِيْ وَلَكُمْ فِى الْقُرْاَنِ الْعَظِيْم. وَنَفَعَنِيْ وَاِيَّاكُمْ بِاْلاَيَاتِ وَالذِّكْرِ الْحَكِيْمِ. وَتَقَبَّلَ مِنِّيْ وَمِنْكُمْ تِلاَوَتَهُ اِنَّهُ هُوَ السَّمِيْعُ الْعَلِيْمُ